讲起环保袋,呢排买卖嘅人都有唔少,但系我就发现咗一个几特别嘅卖环保袋嘅阿伯。阿伯每日朝早都会坐喺芳村地铁站嘅A出口嗰度,手里面揸住一大沓环保袋:有大有细、五颜六色,重好多款添。不过睇真啲,就会发现啲环保袋每款都系得几只,而且上面印咗唔少广告词,应该系啲商家做广告嘅赠品；有几款袋重系最近搞嘅一个展览会嘅参展单位制作嘅添。

    点解阿伯咁多呢啲袋嘅?我突然间谂起前嗰排报纸报道,有啲中老年人喺展览会上面抢赠品,唔通阿伯呢啲袋都系抢返嚟嘅?当然啦,我只系猜测,无证据证明阿伯有噉做过；而且阿伯行动好似唔喺太方便,抢都抢唔过人啦。不过阿伯啲袋每只款都有几个,如果系排队攞嘅,佢都应该排咗好多次。之但喺,阿伯啲袋卖得好平,听讲一两蚊就有交易,所以路过嘅师奶都会帮衬佢买返个。

    望住阿伯,心情好矛盾。佢攞人哋嘅赠品嚟赚钱好唔应该,但佢赚嘅钱里面又真系包含咗佢自己嘅努力(我相信佢系排队攞袋嘅)。或者我应该谂,阿伯平价卖啲环保袋畀人,都算系变废为宝、为环保尽咗一分力,噉样睇佢都应该值得我哋认可嘅!（兰心）